حبيت نعطي , من خلال تدوينتي هذي , لمحة من تاريخ بلادنا و نحكي على فترة من الفترات إلي كانت فيهم تونس وبلدان المغرب العربي أو ما يعرف بالدول البربرية في هاك الوقت، كانت مهيمنة عل اوروبيين والامريكان و حاكمة باحكامها فالعالم، كانو يقراولها ألف حساب و ما ينجم حد يقرب حوض البحر الأبيض المتوسط من غير ما يطلب اذنها.
الفترة إلي نحكي عليها اشتهرت فيها دول المغرب العربي بسيطرتها على البحر المتوسط من خلال أعمال القرصنة، كانت الاساطيل تستعمل موانئ حلق الودي والجزائر وطرابلس كقواعد بش تطلق عمليات هجومية على السفن التجارية التي تعمل في البحر المتوسط و كانت تفرض على الدول الأوروبية بش تدفعلها ضريبة مقابل حماية سفنها: كانت بريطانيا تدفع 600 جنية سنويا ، و هولندا تدفع 600 جنيه، ومملكة صقلية 4 آلاف ريال، ومملكة سردينيا 6 آلاف جنيه، و فرنسا تبعث هدايا ثمينة كيف تبدل القنصل متاعها، وكذلك البرتغال والسويد و النرويج و ألمانيا واسبانيا يدفعوا ضريبة بالإضافة للهدايا...
بعد ما استقلت أمريكا على بريطانيا في اواخر القرن 18 و ولت سفنها ترفع الراية الأمريكية في البحر المتوسط، الاساطيل متاع الدول البربرية ما كانوش ملعاكسين و قامو يستقبلوا فيهم و يرحبوا: الحصيلة متع أعمل القرصنة وصلت إلى أكثر من 10 سفن تجارية أمريكية تم الاستيلاء عليها واقتيادها إلى المواني البربرية.
الامريكان تحطوا قدام الأمر الواقع و تلزو باش يصححوا على سلسلة من معاهدات الصلح مع الدول البربرية تعهدت فيها الولايات المتحدة بدفع ضريبة سنوية، وبمقتضاها استرجعت أسراها، وضمنت عدم تعرض القراصنة لأي سفينة أمريكية تبحر في البحر المتوسط أو في المحيط الأطلسي..
تنجموا تلقاو نص المعاهدة ( المبرمة بين أمريكا و باي تونس في 28 أوت 1797 ) في موقع جامعة يال الأمريكية.
http://avalon.law.yale.edu/18th_century/bar1797t.asp
وهالوثيقة هي المعاهدة الوحيدة التي كتبت بلغة غير الإنجليزية ووقعت عليها الولايات المتحدة الأمريكية خلال تاريخها إلي يتجاوز قرنين، المعاهدة هذي تكتبت باللغة التركية و وقعها جورج واشنطون أول رئيس للولايات المتحدة الأمريكية.
حالة الهدنة هذي استمرت لمدة من ازمان، كنت فيها الامور جبنية مع أولاد عمنا سام، و لكن باشا طرابلس في نهار مل نهاراة طلعتلو الكلبة بنت الكلب و حب يزيد قيمة الضريبة، و بعث لرئيس أمريكا، جفرسن، باش يعلموا بالزيادة هذي.
جفسرن كسح قلبو المرة هذي و قال مانيش دافع، و بعث أسطول بحري باش يلقن باشا طرابلس (ليبيا حاليا) درساً لن ينساه أبدا ههههه.
الحرب هذي تسمات حرب الساحل البربري و دامت 4 سنوات، الولايات المتحدة ارسلت في عام 1801 أسطول حربي متكون من 4 بوارج حربية، و بعثت سفن أخرى من بعد.
أصدر الرئيس الأمريكي الاوامر إلى الاسطول في البحر المتوسط بفرض الحصار على ميناء طرابلس عام 1803 وقصف المدينة بالمدافع.
المعارك أدت إلى استلاء السفن الليبية على البارجة "فيلادلفيا" و أسر طاقمها إلي يتكون من 308 بحار.
قام الاسطول الأمريكي ببعض العمليات المتفرقة وتمكن باش يستولي على قلعة في مدينة دورنا بالإستعانة بفرق من المرتزقة.
الحكاية هذي عملت برشة كوابيس للامريكان، و خلات جنودها يألفوا نشيد يغنيوه كل صباح يقول مطلعو "من قاعات مونتيزوما إلى شواطئ طرابلس نحن نحارب معارك بلادنا في الجو والأرض والبحر".
إنتهات الحرب في عام 1805 وطلب باشا ليبيا يوسف باشا من الولايات المتحدة غرامة مالية تقدر بثلاثة ملايين دولار ذهب، وضريبة سنوية بمبلغ 20 ألف دولار، و قعدت الولايات المتحدة تدفع في الضريبة حماية لسفنها حتى عام 1812.
تو الواحد يقول وين كنا و وين صبحنا
